Ny momba anay (Iza moa zahay)

Bodo Rakotomalala, manana ‘Master en Nutrition Humaine et Santé Publique’ tao amin’ny Oniversity Sorbonne Paris Nord. Izy dia efa niasa nandritry ny 15 taona teo amin’ny sehatry ny fanjariantsakafo teto Madagasikara ;

Tao anatin’izany dia niasa 8 taona tao amin’ny UNICEF: nisahana ny fanohanana ny tetikasam-pirenena mikasika ny fanjariantsakafo, ny fandrindràna fiaraha-miasa eo amin’ny sehatra tsy miankina sy ny fanjakàna amin’ny fanovonana Ioda ny sira, ary ny fitantànana tetikasa marolafy (HAFAVELOTEGNA) fanatsaràna ny fanjariantsakafo tany amin’ny faritra Analanjirofo. Nitarika ihany koa ny fampiroboroboana ny fampiasàna akoratsakafo samihafa iarahana amin’ireo tompon'antoka amin’ny lafiny fambolena sy fiompiana.

Amin’izany i Bodo dia manana traikefa miteraka vina amin’ny lafiny mbola mila tosika, hampiharana ny fampiasàna sakafo samihafa ho an’ny rehetra eto Madagasikara.

Mamisoa dia tia mahandro sakafo hatramin’ ny fony kely ka nampiana-tena mikasika ny tontolon'ny sakafo. Tamin'ny alalan'ny handrana sy fampiharana maromaro no nahaizany tetika maro ara-tsakafo. Izany indrindra no namporisika azy hanokatra ny toeram-pisakafoanana "The Aroma", teto Antananarivo izay nisokatra nandritry ny telo taona.

Nampitombo be ny traikefany izany, na teo amin’ny lafiny fitantanana, na fitondràna olona fa indrindra ny fanaovana sakafo matianina.

Tiany ny manome lanja ny vokatra eto an toerana, trandrahany ihany koa ny fikarohana samihafa hahafahany mivoatra hatrany. Izy no miandraikitra ny nahandro eto @amin’ny Tsy lany tetika Tsara sakafo, mikajy ny fampiasàna sakafo isan-karazany nefa tsy lafo vidy.

Azo antsoina ihany koa i Mamisoa raha mila traiteur ho an’ny lanonam-pianakaviana.

Hari Andrianarivo dia niofana tao amin’ny E-Média Antananarivo, efa nitantana trano fandraisam-peo, namokatra horonan-tsary ho an’ny mpanakanto vao misondrotra, naka sary ary nanao fanamafisam-peo tamina lanonam-pianakaviana maro . Izy koa dia efa niara-niasa tamina orinasa tamin’ny famokarana horonan-tsary fanadihadiana ary efa nilomano tao anatin'ny tontolon'ny serasera.

I Hari dia anisan’ny Mpaka sary sy horonantsary ny Tsy Lany Tetika. Izy no tompon’andraikitry ny famokarana ireo horonan-tsary aseho amin’ny pejy YouTube sy Facebook. Mampiasa fitaovana tsotra toy ny finday anefa miezaka mampitombo ny kalitao, mba ho matihanina sy mahasarika ny mpijery. Tanjon'i Hari ny hampifandray ny talenta eo amin'ny fakàna sary amin’ny fanabeazana amin'ny sakafo isan-karazany. Mandray am-pitiavana ny fanehoan-kevitry ny mpijery izy mba hanatsarana hatrany ny kalitaon’ny vokatra ataonay.

Jacks no zokiny indrindra amin’ny ékipan’ny “TSY LANY TETIKA”. Vao nahavita fianarana dia niasa tao amina orinasa lehibe iray mpamokatra zava-pisotro izy. Tamin’izany vaninandro izany, ny fazahoana asa no laharam-pahamehana dia ao indray vao manatsara sy mampitombo traikefa: Peintre publicitaire no nanombohany ary vetivety foana dia natao Dessinateur Maquettiste (mamorona Logo, Afisy, Etikety, Prospectus na taratasy filazàna ets…).

Nitombo ny filàn’ny orinasa ka nampiofanina “Industrie Graphique” i Jacks. Nanamora izany ny talentany tamin’ny fakàna sary sy ny nanaovany “labo-photo (argentique)” tany an-trano hatry ny fahakely.

Tao amin’ny Sampan-draharaha Dokam-barotra no niatombohany, izay lasa ho “Direction Marketing et Ventes” taty aoriana. “Chef Service Graphique” no toerany nefa koa niandraikitra tranoeva rehefa misy fety nandraisan’ny orinasa anjara sy ny karazam-barotra famporisihana ... Taty aoriana dia niasa tamin’ny ozinina famokarana indray i Jacks ary lasa retraity rehefa nahavita 36 taona tamin’io orinasa io.

Josiane dia Dokotera mpitsabo, nivoaka tao amin’ny Facutlé de Médecine Antananarivo ary niasa 35 taona teo amin’ny lafiny fitsaboana ; singanina amin'izany ny fitsaboana mpiàsa-na- orinasa samihafa tany amin’ny faritany sy teto andrenivohitra; Izy koa dia nandalina manokana ny fikajiana ny fahasalaman’ny zokiolona (médecine anti-âge, gériatrie, gérontologie) sy ny safidy amin’ny fandraisana an-tànana ny fahasalamàna ara-boajanahary (médecine douce/ Naturopathie).

Dr Josiane dia mampianatra ny sakafo ara-pahasalamana entina hiarovana ny aretina maro mpahazo ny zokiolona; mpitsabo ara-tsakafo, manoro fomba fisakafo ho an’ny olona tratry ny aretina samihafa sy ny olona mahia. Nampiofana olona maro, niara-niasa koa tamina vondrona farmasia lehibe nanome torohevitra ny mpajifa isaky ny andro iraisam-pirenena momba ny sakafo, ary nanazatra (coaching) ireo olona izay mila manokana izany. Dr Josiane dia anisan’ny nandray anjara tamin’ny fanomanana rindranasa niarahana tamin’ny Ministeran’ny fahasalam-bahoaka sy ny OMS, mikasika ny fahasalaman’ny zokiolona: ao anatin’izany ny fitaizam-batana sy saina hanomanana fahanterana tsara sy tomady. Dr Josiane no mitantana ny toby ‘Shalom Accueil Itaosy’ (1) Facebook sady misoroka no mandray an-tànana ary manazatra amin’ny fisakafoana mahasalama;

Dr Josiane, dia hitondra ireo tsara ho fantatra maro mikasika ny karazan-tsakafo sy ny fiantraikany amin ny fahasalamàna, eto amin’ny Tsy lany Tetika tsara sakafo.